Diana Escobar; axuda á formación posdoutoral
Diana Morela Escobar Arias, é traballadora social nada en Colombia, que tras traballar con menores e mulleres en situación de vulnerabilidade, no 2015 decide viaxar a Galicia para realizar un master en investigación na Universidade Santiago de Compostela. Estudos que a conduciron a finalizar un doutoramento con mención “cum laude e internacional” e a traballar como docente durante dous anos na Escola Universitaria de Traballo Social de Santiago.
A miña intención é realizar un estudo sobre as principais dificultades e limitacións que se atopan as mulleres migrantes nos territorios de acollida e caracterizar aquelas boas prácticas que estean a promover os seus procesos de liderado e empoderamento comunitario
Actualmente é investigadora dentro do grupo Pedagoxía Social e Educación Ambiental SEPA-interea da USC, un dos grupos de referencia competitiva máis importantes de Galicia. Este grupo conta cunha traxectoria de 26 anos no eido da pedagoxía social e da educación ambiental. Neste sentido, a súa actividade científica e académica, e as liñas de I+D+i nas que participa perseguen unha dobre e complementaria misión: dunha banda, contribuír ao logro dun mellor e maior desenvolvemento da investigación educativa en e para a sociedade e, doutra, promover novas lecturas sobre a investigación e a innovación educativa e as súas potencialidades para dar resposta ás necesidades e demandas encamiñadas a mellorar a calidade da educación e o benestar das persoas en diferentes contextos e realidades (https://www.sepa.gal/sobre-nos.html).
Parabéns Diana, hai unhas semanas que a Xunta de Galicia che concedeu unha axuda de apoio á etapa de formación posdoutoral para o sistema universitario de Galicia e outros centros públicos de investigación.
- Para as persoas que estamos fora do sistema universitario e investigador, explícanos que son este tipo de axudas
As axudas posdoutorais da Xunta de Galicia, teñen a intención de financiar contratos laborais a persoas que recentemente obtivesen o titulo de doutoramento permitindo nunha primeira fase mellorar as súas capacidades mediante estadías de investigación no estranxeiro e nunha segunda fase, consolidar unha liña de investigación propia.
Para solicitalas hai que cumprir cunha serie de requisitos, entre eles o pertencer a algunha institución do Sistema Universitario Gallego (SUG). No meu caso, dende hai dez anos que cheguei a Galicia, formo parte do grupo de Pedagoxía Social e Educación Ambiental da Universidade Santiago de Compostela co cal presentei o proxecto posdoutoral. Entón, por unha banda valóranche a traxectoria profesional e investigadora e polo outro, a pertinencia da investigación posdoutoral.
- En que consiste o teu proxecto?
A miña intención é realizar un estudo sobre as principais dificultades e limitacións que se atopan as mulleres migrantes nos territorios de acollida e caracterizar aquelas boas prácticas que estean a promover os seus procesos de liderado e empoderamento comunitario. Para levar acabo isto, propuxen primeiro a revisión documental daquelas boas practicas que poida haber en Galicia e polo outro a realización de entrevistas e grupos focais a mulleres e a outras persoas que vinculen a súa acción social con elas.
- Vas a ter dúas estadías internacionais, en que centros e que vas facer en cada unha deles?
A primeira estadía no Institute for the Study of Latin America and the Caribbean (ISLAC) (https://www.usf.edu/arts-sciences/institutes/islac/about/index.aspx)da Universidade do Sur da Florida ten como propósito:
- Identificar as metodoloxías que traballa ISLAC en relación as categorías de xénero, arraigamento e migración.
- Caracterizar polo menos catro experiencias de boas prácticas que estean a contribuír aos procesos de liderado e empoderamento de mulleres migrantes
Na segunda estadía, proponse que sexa en Portugal no Centro de Investigación e Estudos en Socioloxía, Instituto Universitário de Lisboa (CIES-Iscte,) (https://cies.iscte.pt/np4/cies/) buscando cumprir os seguintes obxectivos:
- Ter un achegamento aos avances científicos e tamén prácticos do CIES sobre a migración e os procesos de empoderamento de mulleres nas comunidades locais. Para iso, espérase analizar os factores de impacto e as estratexias que tiveron os principais proxectos do grupo de investigación Migracións, Mobilidad e Etnicidad.
- Replicar a análise de boas prácticas realizada no Instituto para o Estudo de América Latina e o Caribe (ISLAC) e establecer puntos de conexión entre os seus contextos que estean a favorecer ou non os procesos de liderado e empoderamento das mulleres migrantes.
- Entón, resumindo un pouco, na primeira fase deste proxecto farías estas dúas estadías e na segunda fase xa consolidarías unha liña de investigación sobre xénero e migracións?
Claro, isto alíñase por unha banda en afondar os estudos de xénero e migración, dende un enfoque interseccional e polo outro, a mellorar a intervención social no ámbito das migracións en Galicia.
É moi difícil acceder a estas axudas, máis para as persoas que vimos de fóra. Dado que, temos que acreditar a experiencia profesional e homologar os estudos de orixe con toda a burocracia, desgaste mental e económico que iso implica. Con todo, hoxe lográmolo e esperamos que as barreiras sexan menores para as mulleres migrantes e que a nosa participación sexa recoñecida en todos os ámbitos, neste caso o de investigación e docencia universitaria.